आई म्हणूनी वय माझेही

आई म्हणूनी वय माझेही
तुझ्यासारखे 'सोळा' आहे
बंडखोरीचा शाप आपुल्या
नात्यामधल्या 'वयास' आहे

कधी झुकावे, कधी झुकवावे
अपुले-तुपले सुरुच आहे
बेफिकीरीचा आव आणला
तरी काळजी करणे आहे
आई म्हणूनी वय माझेही
तुझ्यासारखे 'सोळा' आहे

तुझी भरारी तुझी झेप ही,
दुरुन पाहणे सुखदच आहे
तरी वादळ-वाऱ्याची हूल
मनात वादळ उठवत आहे
आई म्हणूनी वय माझेही
तुझ्यासारखे 'सोळा' आहे

काढू थोडे रुसवे-फुगवे
'फेज' उद्या जाणरच आहे
ठिणग्या उडल्या किती जरीही
प्रेम अबाधित तसेच आहे

तोवर सोसू कळ थोडी,
या भांडणातही गंमत आहे
आई म्हणूनी वय माझेही
तुझ्यासारखे 'सोळा' आहे
बंडखोरीचा शाप आपुल्या
नात्यामधल्या 'वयास' आहे

- एक आई ;)

कविता नवरे